◆ 佘建民

春光明媚，又到一年种树个好辰光。讲起种树，我跟伊个缘分老深个。

六十多年前，阿拉屋里住辣杨浦区个棚户区。当时我正辣读小学，辣爷娘个指导下，我辣屋门前个空地浪插仔一根柳条。只过了一年多，柳条就长成了小树，再往后，越长越大，终于长成了一棵大树。春天里向，我同几个邻居屋里个小囡一道，用柳条编帽子，嘻嘻哈哈，老开心个；到了热天，阿拉就坐辣树荫底下吃西瓜、乘风凉，还利用树干拉晾衣绳。埃歇辰光，棚户区个春天，总是先从柳树枝头浪那一抹鹅黄嫩绿开始显现出来个。

1970年，我踏上知青下乡个征程。到安徽农村个第二年，我拨推选为生产队副队长。春天一到，我依照公社安排，带领大家辣土路两边种了几百棵杨树，还拿村子里房前屋后个空地利用起来，种仔交关泡桐树。搿种被当地人称为“焦桐”个树种，后来竟成了见证时代变迁个绿色地标。

我离开村子去南京读书之前，还专门为自家种个树培土、浇水，就好像是一场与好友依依惜别个仪式。到了南京，每次学堂组织植树活动，我侪积极参加，一趟勿落。长江北岸个植树造林活动里向，老师搭仔同学挥锹培土个身影，构成了我青春岁月里最温暖个记忆画卷。

毕业以后，我拨分配到安徽省312地质队。地质队个工作离不开野外调查活动，只要有得机会，单位就会组织种树。恰逢国家将植树节定为3月12日，搿个日脚与地质队代号一样，说明阿拉搭植物节有个有缘。

此后二十年，每年植树节我侪满怀热忱投入工作，有当年农村种树个经验，从测量放线到挖坑培土，每个环节侪是我个拿手好戏。

等我结婚以后，我同爱人一道，辣自家门口个空地浪种了几棵泡桐树。泡桐长得快，呒没几年就已经高高大大，枝叶繁茂，枝头鸟鸣婉转。到了热天，浓密个树荫撑起遮阳巨伞，带来习习凉风。黄昏时分，一家三口坐辣树下吃饭、乘风凉。后来同事移栽到我院子里个无花果树更为生活添了几分意趣。金秋时节，紫红果实散发个甜香，成为记忆里独特个味觉印记。

1993年，阿拉全家搬到上海，我又搞起了市政工程。一年到头泡辣工地浪，参加过勿少绿化工程个方案设计搭仔实施，亲手种过各种景观树。

现在退休了，每年植树节前后，我总归会同几个老同事相约，一道去当年搞工程建设个地方走走看看，摸一摸当年亲手种下个树木，闻一闻大树散发个清新气息，搿份跟树木亲近个愉悦感呀，真个是笔墨难以形容。